IALe lingua
Le Lingua Universal de Sotos Ochando es un lingua philosophic
disveloppate in 1845 per le pastro e grammatico espaniol Bonifacio
Sotos Ochando e presentate in 1852. Destinate a devenir,
secundo su autor, un lingua scientific international, le lingua de
Sotos Ochando pote esser considerate como un continuation de projectos como illos de
G. W. Leibniz, G. Dalgarno e J. Wilkins, surgite in le seculo XVII. Illo esseva seligite
in 1858 per le Societate Linguistic de Paris como le melior
lingua construite. In 1860 se fundava in Madrid le Societate del Lingua
Universal, institution que effectuava un intense activitate pro le
diffusion del projecto de Sotos e favoriva le creation de diverse
cathedras de lingua universal in Espania. Malgrado su ample acceptation
initial, tanto in Espania como in Francia, le lingua de Sotos Ochando
cadeva tosto in oblido.
Le autor
Bonifacio Sotos Ochando nasceva in Casas-Ibáñez (Albacete) in 1785 e se doctorava in theologia in le Collegio de San Fulgencio in Murcia, del qual ille deveniva rector post occupar se del cathedra de Sancte Sscriptura durante dece-octo annos. Durante le periodo constitutional ille esseva seligite deputato del liberales e in 1823, quando le regime democratic esseva abolite, ille debeva refugiar se in Francia, ubi ille se dedicava al inseniamento e esseva nominate professor de espaniol del Regal Collegio de Nantes e preceptor del filios del rege Ludovico Philippo. Su obras esseva recommendate per le Societate de Methodos de Inseniamento de Paris, specialmente su Grammaire espagnole à l'usage des Français. Postquam ille retornava a Espania in 1840, ille fundava le Instituto de Albacete, esseva nominate membro del Consilio de Instruction Public, cathedratic de theologia del Universitate Central e director del Collegio Polytechnic de Madrid. Ille moriva in Munera (Albacete) in 1869.
